/ Ҳуқуқий саҳифа / Comments are Disabled

 

Бир танишим  “ Қўшним бор,  шу оила озроқ қийин аҳволда ҳозир. Байрамга бир оз озиқ-овқатдан ёрдам берсангиз”, деб қолди.

Бу оилага аталган нарсаларни олиб бордик. Чоғроққина ҳовлича. Уч хонали эски уй,  аммо озодагина.  Қаршимизга уч бола югуриб чиқди. Ортидан қотмадан келган, 35 ёшлар чамасидаги  аёл чиқиб келди.

Суҳбат асносида,  унинг турмуш ўртоғи бошқа аёлга уйланиб Россияга кетиб қолган,  алимент ҳам олмас эканлигини билдим.  Отаси йўқ, онасининг ҳам қўли юпқа,  бир укаси бор экан, у ҳам камдаромад. Ҳаммалари бир ҳовлида туришар экан.

Биз унга ташрифимиздан мақсадимизни  айтиб,  совғаларни берганимизда,  аёл бир оз хафа бўлди.

-Мен камбағал эмасман,  ишлайман, укам ишлайди, кунимиз ўтиб турибди.  Олмайман бу эҳсонни,- деди. Биз унга бу эҳсон эмас,  унинг сабрига мукофот эканлигини айтиб, бир амаллаб кўндириб совғани қолдирдик.

Хонадондан чиқиб кетар эканман, ўзимдан уялиб кетдим. Сабаби,  бир неча кун оилада узилиш бўлса, бир оз тушкунликка тушаман.  Бундай инсонларни эса сабрига,  шукурига қойил .

Аллоҳим,  2023 йилда барча инсонларнинг ризқини улуғ,  тану- жонларини саломат қилсин. Юртимизда муҳтожлар, камбағаллар бўлмасин. Иллоҳим ҳамма бой бўлсин!

Ёқутхон РАҲМОНБЕРДИЕВА.