/ Ҳуқуқий саҳифа / Comments are Disabled

11-13 май кунлари  Журналистларни қайта тайёрлаш маркази томонидан ташкил этилган семинар-тренингда иштирок этиб,    турли манбалардан у ёки бу ташкилотлар томонидан давлат буюртмаларини қандай амалга ошираётганини кузатиш, баъзи ҳолларда коррупцион схемаларни қандай фош этиш, жамоатчилик назоратини кучайтиришга ҳисса қўшиш каби янгиликларни кашф этдим.

Хусусан, e-qaror.gov.uz, Orginfo.uz, Stat.uz, Xarid.uzex.uz каби манбалардан давлат ташкилотлари фаолиятининг очиқ-ошкоралик принципига мос равишда фаолият олиб бораётганини кузатиш, қаердадир коррупцион схемалар орқали муҳим буюртмаларни  кимгадир тегишли масъулияти чекланган жамиятларга берилиб, оқибатда муҳим лойиҳалар чала-чулпа қолиб кетаётганини таҳлил қилдик. 

Иқтисодий мавзулардаги хабар ва мақолаларни Docs.google.com,  Canva.com манбалари орқали ўқувчининг эътиборини жалб қиладиган ҳолатга келтиришни ўргандик.

 Семинарда иштирок этган Коррупцияга қарши курашиш агентлиги масъул ходими Миршод Хўжаев айнан шундай коррупцион схемаларни фош қилишда ОАВ ходимлари ва блогерларнинг ўрни муҳим эканлигини таъкидлаб, агентлик жамоатчилик назоратини ўрнатиш ва кучайтиришда фаолликка чорлади. 

Юқоридаги манбалар билан ишлашни ўрганиш жараёнида қизиқ бир фактга дуч келдим. Яъни Тошкент шаҳар туманларидан бирининг ободонлаштириш бошқармаси  давлатнинг 624 млн сўмлик қўл-қурилиш ишлари буюртмасини амалга оширишга устав вазифаси бинолар фасадини қуриш ва таъмирлаш бўлган пудратчи ташкилотни ёллаган. У ўз навбатида субпудратчи ёллаган, қарангки, ушбу субпудратчи юқоридаги ободонлаштириш бошқармаси бошлиғи 100 фоиз таъсисчиси бўлган МЧЖ бўлиб чиқди, уставига кўра унинг вазифаси – бинолар атрофини тозалаш экан. 

Ярим млрд сўмдан зиёдроқ маблағни ушбу йўл қурилишига алоқадор бўлмаган, устав фонди атиги 8 млн сўм бўлган “чўнтак” МЧЖларига ажртилганининг ўзиёқ, бу ерда коррупцион схема ишлаганини кўрсатиб турибди.

Демак, мамлакатимизда жорий этилган ва этилаётган ошкоралик принципи нафақат ОАВ ва блогерлар, балки барча фуқароларга жамиятнинг барқарор ривожланиши учун коррупцияга қарши курашиш, иқтисодий жиноятларнинг олдини олиш,    у ёки бу воқелик (қўшма корхоналар, кластерлар ва ҳ.к. ишга тушиши)нинг мамлакат истисодиёти ва аҳоли фаровонлигига таъсири ҳақида аниқ таҳлил қилишларига имконият яратди ва биз бу имкониятдан тўлиқ фойдалана олсаккина, жамиятимиз чинакам коррупциядан холи ва барқарор ривожланиш йўлига ўтади.

Зебо Ҳайдарова, журналист.