Туман электр таъминоти корхонаси мансабдорларининг «ўчириб-ёқиш» ўйинига чек қўйилди

Электрдан қарзингиз бўлса ўз вақтида тўлаб қўйганингиз маъқул. Лекин қарзингиз бўлмаса-чи? Ёки тармоққа ноқонуний уланиш холатида айбдор деб топилсангиз ва электр ҳаққига хиёнатда сизни айблашса? Нима қилган бўлардингиз? Маҳаллий электр таъминоти корхонасининг раҳбарига мурожаат қилишингиз табиий. Лекин айнан электр таъминоти корхонасининг раҳбари сизни айбсиз айбдор қилиб турсачи? Буниси ҳам етмагандек, тадбиркорни қўллаб-қувватлаш ўрнига таъмагирлик қилиб, пул сўраса-чи? Бундай холатда ҳуқуқ-тартибот органларига мурожаат қилишингиз тайин. Сирдарё вилоятининг сайхунобод туманида худди шундай ҳолат содир бўлди. Яъни туман электр таъминоти корхонасининг собиқ бошлиғи ва унинг ўринбосари тадбиркорлардан пул ундиришнинг янгича услубини ўйлаб топишди. Яхшиям-ки, уларнинг бу топилмаси узоққа чўзилмади. Суд ҳукми билан уларнинг жиноий қилмишига сўнгги нуқта қўйилди. Суд мажлисида панжара ортида судланувчи сифатида сўроқ қилинган икки нафар шахс Сайхунобод туман электр таъминоти корхонаси бошлиғи ва  ўринбосари лавозимида дуппа- дуруст ишлаб келаётган эди. Лекин пулнинг иси димоғини қитиқлаб, нафсини уйғотди шекили, тумандаги тадбиркорлик субъектларида электр токини ёқиб ўчириш ўйинини бошлади. Албатта пул эвазига. Яъни туманда фаолият юритаётган МЧЖларни электр тармоғидан ҳеч қандай ҳужжатлар расмийлаштирмасдан ўчиртириб, таъмагирлик йўли билан уларга гўёки 6 миллион сўмдан тўлашса электр энергиясини ёқиб беришларини талаб қилади. Гуёки аниқланган зарарни ҳисобга қўймасдан, эвазига 7 миллион сўм пулларни ҳисоб рақамига тўлашни талаб қилиб, шундан 1 миллион сўмини олиб, ҳеч қаерга тўловни амалга оширмай, ўз эҳтёжлари учун ишлатиб юборишади. Мазкур МЧЖни электр энергиясига қайта улаб, бироқ қолган пулларни олиб келмаганидан сўнг қайта электр энергия тармоғидан узишиб, қолган 6 миллион сўмини беришини талаб қилишади. Уларнинг ўйинидан зада бўлган тадбиркорлар ўз вақтида ҳуқуқ-тартибот органларига хабар қилишади ва таъмагирлар айтилган пулларни  Сайхунобод ТЭТК маъмурий биносида тезкор тадбир давомида имо-ишора билан АСКУЭ хонасидаги шкаф ичига қўйдирган вақтида ашёвий далиллар билан ушланади.

Суд мажлисида жабрланувчилар икки нафар судланувчи тадбиркорлик субъектларини электр тармоғидан уздириб тадбиркорнинг манфаатига жиддий зиён етказганини исботлаб беришди. Оқибатда  Сайхунобод ТЭТКнинг собиқ раҳбари ва унинг ўринбосарига суд ҳукми ўқилди. Яъни уларнинг ҳар бирига  Ўзбекистон Республикаси Жиноят Кодексининг 210-моддаси 2-қисми “в,г” бандлари билан ЖКнинг 45-моддасини қўллаб, икки йил муддатга мансабдорлик ва моддий жавобгарлик лавозимларда ишлаш ҳуқуқидан маҳрум қилган ҳолда, беш йилдан озодликдан маҳрум қилиш жазоси тайинланди.

Ўз қўли билан нафсига эшик очиб берган бу икки мансабдор, таъмагирлик қилмай ҳалол ишлаганида эди бугун суд залидан панжара ортига қараб йўл олмаган бўлармиди?.

Иброҳим ҚОРАБОЕВ,

Вилоят судининг Жиноят ишлари бўйича судлов ҳайъатининг судьяси.