/ Ҳордиқ / Comments are Disabled

Мағрур, чиройли қадам ташлаб юрган аёлларнинг ташқи кўринишидаги баъзи бир камчиликлар умуман сезилмайди. Чунки ҳамма ўз эътиборини аёлнинг зебо, енгил қадам ташлашига қаратади. Озғин, лекин букчайиб юрган қизлардан кўра, тик гавда билан текис қадам ташлаётган тўлароқ қизлар чиройли кўринади. Текис қоматингиз атрофдагиларга ўзингизга бўлган ҳурматингиз, ишончин-гиз, қадр-қимматингизни, ўзингизни ушлай билишингиз, ҳаётда аниқ бир йўлни танлаб, ўша йўлдан бошингизни мағрур тутган ҳолда кетаётганингизни билдиради. Ишонаверинг, сизнинг ёшингизда бу хислатларни кам, деб бўлмайди.

Кўзгу ёнига келинг ва қоматингизга бир қиё боқинг. Бошингизни сал юқорига кўтаринг, елкаларингизни тўғри тутиб, қорнингизни ичга тортинг. Гавдани тўғри тутишнинг ҳеч қийин жойи йўқ, лекин уни биринчи 5 дақиқадагина эмас, балки ҳар дақиқа ва ҳар куни тўғри тутишга ўрганиш керак. Бу эса сиздан озми-кўпми ҳаракатни талаб этади. Сиз гавдангизни тўғри тутишни қанча эрта бошласангиз, шунча яхши. Бунинг учун сизга бир қанча машқларни таклиф этамиз.

Тўғри туринг, оёқлар елка кенгликда, қўлингиз белда. Елкангизни тўғри тутган ҳолда пастга энгашинг, бошингизни сал кўтариб туринг. Бу пайтда бошингиз ерга эмас, тўғрига қараши керак. Сўнг аввалги ҳолатга қайтинг.

Полга ўтиринг, қўлларингиз белда, оёқларингиз тўғрига узатилган. Аста-секинлик билан орқага ётинг ва худди шундай аста-секинлик билан аввалги ҳолатга қайтинг. Бу машқни бажараётганингизда елкангиз-нинг тўғри туришига эътибор беринг.

Чалқанча ётинг. Оёқла-рингизни букиб, танангизга яқинлаштиринг. Қўлингиз билан оёқларингизни қучоқланг. Шундай қилиб оёқларингизни қўйиб юбормасдан ўтиришга ҳаракат қилинг ва яна аввалги ҳолатингизга қайтинг. Бунда эътиборингизни елкангизга қаратинг. Елкангиз тўғри, текис бўлишига аҳамият беринг.

Бошингизга бир-иккита китоб қўйиб, китобларни тушириб юбормасдан тўғри чизиқ бўйлаб юринг.

Бу каби машқларни кунига икки-уч мартадан 10-15 мартагача бажаришингиз мумкин.

Фақатгина текис йўлдан эмас, балки зинадан ҳам тўғри чиқишни билишингиз керак. Қўлингиз бир нарсага тиралиши ҳисобига эмас, оёқларингиз ҳисобига зинадан чиқишингиз керак. Оёқларингиз учида зинадан чиқишингиз ҳам тўғри бўлмайди.

Чиройли юришингиз учун оёқ кийимингиз ҳам катта аҳамиятга эга. Оёқ кийимингиз тор ёки кенг бўлса, сиқиб турса чиройли юриш ҳақида ўйламасангиз ҳам бўлади. Чунки бунда бир амаллаб уйимга етиб олсам бўлди, каби фикрдан нарига ўтолмайсиз. Оёқ кийимингизнинг пошнаси йўқ бўлса, юришингиз ўғил болаларникига ўхшаб қолади. Баланд пошнада эса вазн оғирлиги оёқ учига тушади ва тиззалар букилмайди. Бунда аёл киши енгил қадам ташлай олмайди. Шунинг учун оёқ кийимингизнинг пошнаси ўртача бўлмоғи лозим.