Жамила Ҳамроқуловани Гулистон туманида каттаю-кичик танийди, бу опа ўзининг ишчанлиги, камтарлиги, одамижонлиги билан барчанинг ҳурматини ва меҳрини қозонган бахтли аёллардан.
Жамила опа АТ “Агробанк”нинг Гулистон тумани филиалида фаолият юритишни бошлаганига ҳам 28 йил бўлибди. Шу йиллар давомида Жамила опа бирор маротаба бўлса-да туманда қолиб кетганидан нолимади. Тошкент Давлат халқ хўжалиги институтининг иқтисодиёт факультети (ҳозирги Иқтисодиёт университети)ни тугаллаган Жамилани дастлаб Марказий банкда олиб қолишди. Аммо бир оз вақт ўтгач Жамила ота-онаси бағрига қайтиб, уларнинг орзусини рўёбга чиқарди, “оқ фотиҳа” олиб келин бўлди ва АТ “Агробанк”нинг туман бўлимига ишга кирди. Шуни алоҳида таъкидламоқ зарурким, Жамила опа “бир жойда кўкарган дарахтлардан”. Яъни АТ “Агробанк”нинг туман филиалида бир ўринда, ҳисобчи лавозимида 28 йилдан буён меҳнат қиляпти.
— У пайтларда эмизикли бола билан ишга чиқиб кетаверардик, — дея хотирлайди Жамила опа. – Банк иши осон эмас, айниқса, ҳисобот даврида кечалари қолиб ишлашга ҳам тўғри келган. Худога шукур, турмуш ўртоғим ишимни яхши тушунар, интилишларимни ҳурмат қилар эди, ҳозир ҳам шундай. Ҳозирда баъзи ёшлар келин банкда ишлайди, дейилса, ўйланиб қолишади. Менимча, ишонч ҳамма нарсадан устун турмоғи зарур. Севган кишингга ишонсанг, албатта, садоқат қилади. Мен ҳам турмуш ўртоғим билан фарзандларим Жавлон, Дилдора, Диёраларни ишлаб юриб катта қилдик. Боғчада кеч қолиб кетган кунлари ҳам бўлган, якшанба кунлари бобо-бувиларига ташлаб ишга чиққанман. Аммо, уй-рўзғорга кечалари ухламасдан бўлсаям эътибор қаратардим, биринчидан, турмуш ўртоғимдан гап эшитмаслик учун, иккинчидан, унинг кўнглини оиладан совутмаслик учун. Ишхонада барча билан муносабатим яхши, ростини айтсам, жамоанинг ярми- шогирдларим. Баъзилари кўтарилиб кетган, шу ерда ишлаганлари билан қадрдон опа-ука, опа-сингил бўлиб кетганмиз. Одилбек Ҳайдаров, Жўрабек Усмонов, Қодир Мирашуров, Қаҳрамон Раҳимов, Лола Ҳусанова, Шаҳноза Раҳмонова каби шогирдларим билан ҳақли равишда ғурурланаман.
Жамила опани дастлаб туман марказида жойлашган тўйхоналардан бирида юртимиз мустақиллигининг 23 йиллигига бағишланган тадбирда кўрган ва бу аёлнинг толмас ташкилотчилигига тан берган эдим. Гулистон тумани давлат муассасалари касаба уюшма ташкилотларини бирлаштириб, тармоқ касаба уюшмалари ҳаётида фаолликни тарғиб қилаётган Жамила опа ўзи ҳам банк муассасасида бошланғич касаба уюшма қўмитаси раиси, ўзининг асосий ишидан вақт топиб, касаба уюшмалари аъзолари билан турли-туман тадбирлар ўтказади, бундан ташқари уни мутахассис сифатида Гулистон иқтисодиёт касб-ҳунар коллежининг “банкларда бухгалтерия ҳисоби” йўналишида таълим олаётган ўқувчиларга сабоқ беришга жалб этишган.
— Машҳур “Ишдаги ишқ” фильмидаги Зинага айланиб қолмадингизми, ишқилиб? — ҳазиллашиб сўрадим опадан.
— Йўғ-е, мен учун ҳамиша иш биринчи ўринда, лавозимим жуда масъулиятли, аммо, нима қилай, ташкилотчилик қон-қонимга сингиб кетган, — дейди Жамила опа кулиб. – Албатта, касаба уюшмаларини бирлаштириш, турли туман тадбирлар ўтказиш, соғлом турмуш тарғиботи, ва бошқаларда ёнимда турган ҳаммаслакларим бор. Хусусан, туман молия бўлими бошланғич касаба уюшма қўмитаси раиси Баҳромжон Мақсудов, туман давлат архиви бўлими бошланғич касаба уюшма қўмитаси раиси Эркинжон Абдуллаев, туман солиқ инспекцияси бошланғич касаба уюшма қўмитаси раиси Жаҳонгир Мамаражабовлар билан қалин ҳамкорликда ташкил қиламиз тадбирларни.
Шу ўринда, юқорида тилга олиб ўтган тадбирни айтмоқ жоиздир, ўша куни Жамила опа ўнта давлат муассасалари касаба уюшмалари аъзоларини бир даврада жамлади. Жамладигина эмас, уларнинг орасидан шу йил ўтказилган “Ўз соҳасининг энг моҳири” кўрик-танлови туман босқичи ғолибларини тақдирлаш маросимини ўтказди. Шуниси эътирофга сазоворки, ушбу ташқаридан қараганда жиддий муассасаларда меҳнат қилаётган йигит-қизлар нафақат ўз касбларининг усталари, балки истеъдод соҳиблари эканликларини ҳам намоён эта олдилар. Солиқ инспектори шеър айтди, банк ходими саҳна кўринишларида иштирок этди, ҳокимият вакиллари топқирликда беллашдилар. Хуллас ана шундай қизғин даврада касаба уюшма қўмиталари ўзларининг бирлашган ва аҳилликларини кўрсатдилар. Жамила опа эса ҳар галгидек “онабоши”, ҳар ишда бош-қош бўлди. Биз эса касаба уюшмалари ташкилотларида ана шундай фидойи инсонлар, айниқса, аёллар борлигидан фахрланиб қайтдик.
З.Кубаева.
Comments are closed